Адпачынак з карысцю
1 красавіка для вучняў 5 - 8 класаў Канвелішскага НПК была арганізавана экскурсія на аб'екты г. п. Воранава.
Спачатку завіталі ў Дэпартамент аховы, дзе дзяцей азнаёмілі са спецыфікай работы супрацоўнікаў аховы, са спецсродкамі, якімі карыстаюцца служачыя дэпартамента. Экскурсію правёў старшы прапаршчык А. Т. Ардзюк. Асабліва спадабалася вучням выступленне міліціянера - кінолага з сабакам, у ходзе якога былі прадэманстраваны навыкі чацвераногага сябра. А таксама дзеці мелі магчымасць пасядзець у спецтранспарце і прымераць бронекамізельку, каску, экіпіроўку.
Наступным пунктам экскурсіі з'явілася наведванне Белаграпрамбанка. Тут вучні ўбачылі машыну - апарат, якая вызначае сапраўдную і фальшывую купюры, лічыльную машыну, пазнаёміліся з відамі банкаўскіх карт ад дзіцячых да пенсійных. Асаблівую цікавасць навучэнцаў выклікаў бескантактны плацежны пярсцёнак. Кожнаму захацелася яго прымераць. У канферэнц - зале была прадэманстравана прэзентацыя "Асцярожна: віртуальныя ашуканцы!"
Прадстаўнікі наведаных служб шчыра пажадалі вучням цікавага і бяспечнага адпачынку ў час вясновых канікул і поспеху ў вучобе.
